ಅವರೆ ಬೆಳೆಸಿ ಹೆಚ್ಚು ಲಾಭ ಪಡೆದುಕೊಳ್ಳಿ

 ಅವರೆ (Lablab purpureus sweet) (ಕುಟುಂಬ: ಪ್ಯಾಪಿಲಿಯೋನೇಸೀ) ಹೆಬ್ಬಾಳ ಅವರೆ ಜನಪ್ರೀಯ ಏಕವಾರ್ಷಿಕ ಬೆಳೆ. ಸಾಮಾನ್ಯವಾಗಿ ಇದನ್ನು ರಾಗಿ ಮತ್ತು ಜೋಳಗಳ ಜೊತೆಗೆ ಮಿಶ್ರ ಬೆಳೆಯಾಗಿ ಬೆಳೆಯುತ್ತಾರೆ. ಕರ್ನಾಟಕದ ದಕ್ಷಿಣದ ಭಾಗಗಳಲ್ಲಿ ಅವರೆಯನ್ನು ದ್ವಿದಳ ಧಾನ್ಯ ತರಕಾರಿ ಹಾಗೂ ಮೇವಿಗಾಗಿಯೂ ಬೆಳೆಯುತ್ತಾರೆ.

ತಮಿಳುನಾಡು, ಆಂಧ್ರ ಪ್ರದೇಶ ಮತ್ತು ಮಹಾರಾಷ್ಟ್ರಗಳಲ್ಲಿಯೂ  ಈ ಬೆಳೆಯು ಜನಪ್ರಿಯವಾಗಿದೆ. ಅವರೆಯ ಉಪಯುಕ್ತತೆಯನ್ನು ಪರಿಗಣಿಸಿ ಹಲವಾರು ವರ್ಷಗಳ ಸಂಶೋಧನೆಯ ಫಲವಾಗಿ ಬೆಂಗಳೂರು ಕೃಷಿ  ವಿಶ್ವವಿದ್ಯಾನಿಲಯದವರು, ಹೆಬ್ಬಾಳ ಅವರೆ -3 ಎಂಬ ತಳಿಯನ್ನು ಅಭಿವೃದ್ಧಿಪಡಿಸಿ 1978 ರಲ್ಲಿ ಬಿಡುಗಡೆ ಮಾಡಿದರು. ನಂತರ 1997 ರಿಂದ ಈಚೆಗೆ ವಿಶ್ವವಿದ್ಯಾನಿಲಯದ ಬಿ.ಎಸ್.ಪಿ. ಘಟಕವು ಈ ತಳಿಯನ್ನು ಶುದ್ಧೀಕರಿಸಿ, ಪುನಶ್ಚೇತನಗೊಳಿಸಿ ಬೀಜೋತ್ಪಾದನೆಯ ಕಾರ್ಯದಲ್ಲಿ ನಿರತವಾಗಿದೆ. ಈ ಬೆಳೆಯನ್ನು ಉತ್ತರ ಕರ್ನಾಟಕದಲ್ಲಿಯು ಸಹ ಬೆಳೆದು ಹೆಚ್ಚಿನ ಲಾಭ ಪಡೆಯಬಹುದಾಗಿದೆ. 

ಇದು 85-90 ದಿವಸಗಳ ಅವಧಿಯಲ್ಲಿ ಕಟಾವಿಗೆ ಬರುವ ಅಲ್ಪಾವಧಿ ತಳಿ.  ಈ ತಳಿಗೆ ಬಳ್ಳಿಯಾಗಿ ಹಬ್ಬುವ ಗುಣವಿರುವುದಿಲ್ಲ.  ಸೂರ್ಯಪ್ರಕಾಶದ ಅವಧಿ (Photoperiod) ಈ ಬೆಳೆಯ ಮೇಲೆ ಯಾವ ಪರಿಣಾಮವನ್ನೂ ಬೀರುವುದಿಲ್ಲ.  ಆದ್ದರಿಂದ ವರ್ಷದ ಯಾವ ಕಾಲದಲ್ಲಾದರೂ ಬೆಳೆಯಬಹುದು.   

ಹೂಗಳ ಬಣ್ಣ ಬಿಳಿ: ಎಳೆಯ ಕಾಯಿಗಳ ಮತ್ತು ಬೀಜಗಳ ಬಣ್ಣ ಹಸಿರು; ಬಲಿತ ಕಾಯಿಗಳಲ್ಲಿ ತಿಳಿ ಕಂದು ಬಣ್ಣದ 3-4 ದುಂಡನೆಯ ಬೀಜಗಳಿರುತ್ತದೆ.

ಬಿತ್ತನೆ ಕಾಲ: ವರ್ಷದ ಯಾವ ಸಮಯದಲ್ಲೂ ಬಿತ್ತನೆ ಮಾಡಬಹುದು.

ಅಂತರ: ಸಾಲಿನಿಂದ ಸಾಲಿಗೆ 45 ಸೆ.ಮೀ. ಬೀಜದಿಂದ ಬೀಜಕ್ಕೆ 15 ಸೆ.ಮೀ.

ಸಸ್ಯ ಸಂರಕ್ಷಣೆ:

ಕೀಟಗಳು: ಏಫಿಡ್, ಎಲೆ ತಿನ್ನುವ ಹಾಗೂ ಕಾಯಿ ಕೊರೆಯುವ ಹುಳಗಳು.

ಸಂರಕ್ಷಣಾ ವಿಧಾನ: ಬಿತ್ತನೆಯ ನಂತರದ 35-40 ದಿನಗಳಲ್ಲಿ ಹೂ ಬಿಡುವ ಒಂದು ವಾರದ ಮುನ್ನ ಕೀಟನಾಶಕ ದ್ರಾವಣವನ್ನು (ಒಂದು ಲೀಟರ್ ನೀರಿಗೆ 2 ಮಿಲಿ ಲೀಟರ್ ಮೊನೊಕ್ರೊಟೊಫಾಸ್ ಅಥವಾ 4 ಗ್ರಾಂ ಕಾರ್ಬರಿಲ್ 50 w.p. ಬೆರೆಸಿದ ದ್ರಾವಣ) ಸಿಂಪಡಿಸಬೇಕು.  ಕೀಟಗಳ ಬಾಧೆಯು ಹೆಚ್ಚಾಗಿ ಕಂಡು ಬಂದಲ್ಲಿ ಪ್ರತಿ 15 ದಿವಸಗಳಿಗೊಮ್ಮೆ 3-4 ಸಿಂಪರಣೆಗಳನ್ನು ಮಾಡಿ ಹತೋಟಿಗೆ ತರಬಹುದು.  ಕೊಯ್ಲಿಗೆ ಮುಂಚೆ ಮೆಲಾಥಿಯಾನ್ ಪುಡಿಯ ಸಿಂಪರಣೆಯಿಂದ ಉಗ್ರಾಣದ (ಶೇಖರಣೆಯ) ಕೀಟಗಳ ನಿಯಂತ್ರಣವು ಸಾಧ್ಯವಾಗುತ್ತದೆ.

ರೋಗಗಳು: ಎಲೆ ಚುಕ್ಕೆ ರೋಗ ಮತ್ತು ಆಂಥ್ರಾಕ್ನೊಸ್ ರೋಗಗಳ ಸೂಚನೆ ಕಂಡ ಕೂಡಲೇ ಒಂದು ಲೀಟರ್ ನೀರಿಗೆ 2-3 ಗ್ರಾಂ ಮ್ಯಾಂಕೊಂಜೆಬ್ (Dithane-M-45) ಪುಡಿಯನ್ನು ಬೆರೆಸಿ ತಯಾರಿಸಿದ ದ್ರಾವಣವನ್ನು ಸಿಂಪರಣೆ ಮಾಡಿದರೆ ರೋಗದ ಹತೋಟಿಯಾಗುತ್ತದೆ.

ಹಸಿರು ತರಕಾರಿ ಕಾಳು/ಬೀಜ:

ಬೀಜೋತ್ಪಾದನೆ ಸಮಯದಲ್ಲಿ ಅನುಸರಿಸಬೇಕಾದ ಕ್ಷೇತ್ರ ಹಾಗೂ ಬೀಜ ಮಾನದಂಡಗಳು

 ಇಳುವರಿ:  4-5 ಕ್ವಿಂಟಾಲ್ ಪ್ರತಿ ಎಕರಿಗೆ (ಖುಷ್ಕಿ), 6-8 ಕ್ವಿಂಟಾಲ್ ಪ್ರತಿ ಎಕರಿಗೆ(ನೀರಾವರಿ)

ಲೇಖಕರು:

1. ಡಾ. ಲೋಕೇಶ್ ಕೆ., ಸಹಾಯಕ ಪ್ರಾಧ್ಯಾಪಕರು ಮತ್ತು ಮುಖ್ಯಸ್ಥರು, ಬೀಜ ವಿಜ್ಞಾನ ಮತ್ತು ತಂತ್ರಜ್ಞಾನ.

2. ಶ್ರೀ ಸುಹಾಸ ಪಿ.ಡಿ., ಸಹಾಯಕರು, ಕೃಷಿ ಮಹಾವಿದ್ಯಾಲಯ, ಕಲಬುರಗಿ, ಕೃಷಿ ವಿಶ್ವವಿದ್ಯಾಲಯ, ರಾಯಚೂರು.